दक्षिण कोरियाका पूर्व प्रथम महिलालाई २० महिनाको जेल सजाय

सियोल – दक्षिण कोरियाको अदालतले पूर्व प्रथम महिला किम केओन हीलाई भ्रष्टाचारको आरोपमा २० महिनाको जेल सजाय गरेको छ । सियोल केन्द्रीय जिल्ला अदालतले बुधबार किमलाई घुस लिएको अभियोगमा दोषी ठहर गरेको हो । यद्यपि अदालतले स्टक हेरफेर र चुनावी वित्तसम्बन्धी कानून उल्लंघनका आरोपबाट भने उनलाई मुक्त गरेको छ ।  

५३ वर्षीया किम लामो समयदेखि विभिन्न विवादमा तानिँदै आएकी छन् । भ्रष्टाचार, प्रभावको दुरुपयोग र शैक्षिक अभिलेखमा अनियमितता जस्ता आरोपहरूले उनका पति, पूर्वराष्ट्रपति युन सुक योलको कार्यकालभरि दक्षिण कोरियाको राजनीतिक जीवनलाई प्रभाव पार्दै आएका थिए । किम र युन दुवै डिसेम्बर २०२४ मा मार्सल ल घोषणा र त्यसपछि उत्पन्न राजनीतिक अराजकतासँग सम्बन्धित घटनाका कारण हिरासतमा छन् ।  

अदालतका अनुसार किमले व्यवसायी र राजनीतिज्ञहरूबाट दुई लाख अमेरिकी डलरभन्दा बढी मूल्यका उपहार र नगद लिएको पाइएको छ ।  

यी उपहारमध्ये एक धार्मिक समूहका नेताबाट प्राप्त दुईवटा ब्रान्डेड ह्यान्डब्याग र गहना पनि थिए । यद्यपि अभियोजन पक्षले लगाएको स्टक हेरफेर र चुनावी कोष दुरुपयोगको आरोप प्रमाणित गर्न सकेन ।  

सजाय सुनुवाइका क्रममा किम कालो पोसाक, मास्क र चस्मा लगाएर उपस्थित भइन् । अभियोजकहरूले किमले आफूलाई कानूनभन्दा माथि ठान्ने र राज्य तथा धर्मबीचको संवैधानिक विभाजन कमजोर पार्ने कार्यमा संलग्न भएको दाबी गरेका छन् । अभियोजनको तर्क अनुसार उनका यी क्रियाकलापहरूले देशका संस्थाहरूलाई गम्भीर रूपमा कमजोर पारेको थियो ।      

किमले आफ्नो अन्तिम बयानमा आरोपहरू अन्यायपूर्ण भएको बताउँदै अस्वीकार गरेकी छन् । तर उनले आफ्नो भूमिकाले समस्या उत्पन्न गरेको स्वीकार गर्दै माफी मागेकी पनि छन् । ‘मलाई सुम्पिएको जिम्मेवारीबारे सोच्दा धेरै गल्ती गरेको स्पष्ट हुन्छ,’ किमले अदालतमा भनिन् ।  

किममाथिका घोटालाहरूले पूर्वराष्ट्रपति युनको राजनीतिक एजेन्डालाई बारम्बार छायामा पारेका थिए । सन् २०२३ मा सार्वजनिक भएको एक भिडियोमा उनले महँगो लक्जरी ह्यान्डब्याग स्वीकार गरेको दृश्य ‘डायर ब्याग काण्ड’का रूपमा चर्चामा आएको थियो । यसले देशभर आलोचना र विरोधको लहर छर्नासाथ सन् २०२४ को संसदीय चुनावमा युनको दलको हारमा समेत भूमिका खेलेको विश्लेषकहरूले बताउँछन् ।  

यो प्रकरणसँगै धार्मिक समूह युनिफिकेशन चर्चका नेता र केही शीर्ष नेताहरूमाथि पनि अनुसन्धान र सजाय प्रक्रिया अघि बढिरहेको छ । अदालतका निर्णयहरूले पछिल्ला वर्षहरूमा दक्षिण कोरियाको राजनीतिक संकट अझ गहिरो बनाएको छ ।