सेरेना टेनिसमा फर्कने अनिश्चित

टेनिसकी २३ पटककी ग्रान्डस्लाम विजेता सेरेना विलियम्सले प्रतिस्पर्धामा पुनः फर्कने कि नफर्कने भन्ने सम्भावनालाई अस्वीकार गरेकी छैनन् तर स्पष्ट जवाफ दिन पनि अस्वीकार गरेकी छन् । एउटा टेलिभिजन कार्यक्रममा उनले भनिन्, ‘मलाई थाहा छैन । म के हुन्छ होला भविष्यमा भन्ने चासो चाहिँ छ ।’              

चवालिस वर्षीया दुई सन्तानकी आमा सेरेनाले २०२२ युएस ओपनमा तेस्रो चरणको हारपछि प्रतियोगिता खेलेकी छैनन् । उनले डिसेम्बरमा टेनिस एन्टि–डोपिङ परीक्षण पुलमा पुनः प्रवेश गरिन् तर त्यसलाई पुनरागमनको सङ्केतको रूपमा लिइँदैन । सेरेनाकी दिदी भेनसले ४५ वर्षमा अस्ट्रेलियन ओपनमा भाग लिएर उनका प्रशंसकहरूलाई ऊर्जा दिएकी थिइन् तर उनी पहिलो चरणमा नै नकआउट हुन पुगिन् । भेनस जुलाईमा टेनिसमा फर्केपछि अकल्यान्ड र होबार्ट प्रतियोगितामा पनि खेलेकी थिइन् ।                  

पूर्व विश्व नम्बर एक जिम कुरियरका अनुसार, टेनिस खेलाडीलाई एन्टि–डोपिङ परीक्षण पुलमा रहनु गाह्रो हुन्छ र परीक्षण पूरा नगरी प्रतियोगितामा फर्कन अनुमति पाइँदैन । कुरियरले भने, ‘सेरेनाले डिसेम्बरमा फर्कने कुरा अस्वीकार गरिन्, तर उनी घाइते नभएसम्म मैदानमा पुनः फर्कने सम्भावना भने रहिरहन्छ ।’ सेरेना र भेनस बहिनीहरूले जोडीको रूपमा १४ ग्रान्ड स्लाम डबल्स उपाधि र तीन ओलम्पिक स्वर्ण पदक जितेका छन् । उनीहरू मैदानमा फर्कनेबारे उनका प्रशंसकहरूलाई सधैं चासो रहने गरेको छ ।