मन्त्री क्वार्टरमा बिचौलिया घुसको ‘ब्रिफकेस’ छाड्छन् : शेखर कोइराला

काठमाडौं । सत्तासाझेदार दल नेपाली कांग्रेसका नेता डा. शेखर कोइरालाले मन्त्री क्वार्टरमा पुगेर बिचौलियाले घुसको ‘ब्रिफकेस’ छाडेको आरोप लगाएका छन् । मंगलबार (असार ३१) बिहान सामाजिक सञ्जालमार्फत उनले घुस प्रकरणमा मुछिएका मन्त्रीलाई बर्खास्त नगरिएको भन्दै असन्तुष्टि जनाएका हुन् ।

पछिल्ला दिन संघीय मामिला तथा सामान्य प्रशासनमन्त्री राजकुमार गुप्ताको घुस ‘डिल’बारेको अडियो चर्चामा छ । “मन्त्री क्वार्टरमा बिहानै आएर बिचौलियाले घुसको ब्रिफकेस छाड्छन्, आफ्नोविरुद्धमा प्रमाण जुटेपछि बर्खास्त हुनुपर्नेमा प्रधानमन्त्रीसँग मिठा कुरा गरेर मन्त्री मन्त्रिपरिषद् बैठकमा भाग लिन्छन्,” उनले एक्स पोस्टमा लेखेका छन् ।

संसद् बैठकमा विपक्षी दलका नेताहरूले विवादित मन्त्रीको ‘कर्मकाण्डी’ राजीनामा मात्र माग्ने गरेको र उनीहरू कडा रूपमा प्रस्तुत हुन नसकेको डा. कोइरालाले टिप्पणी गरेका छन् । सत्ता गठबन्धनको सहायत्री दल कांग्रेसको भूमिकाप्रति पनि उनले आपत्ति जनाएका छन् ।

‘यस्तै रहेछ यहाँको चलन’ शीर्षक दिएर उनले लेखेका छन्, “सदनमा विपक्षी कर्मकाण्डी राजीनामा माग्छन् तथा गठबन्धनका सहयात्री हामी नेपाली कांग्रेस भने ‘साक्षी किनाराका सदर’ भएका छौँ ।”

यस्तै रहेछ यहाँको चलनः
मन्त्रीक्वाटरमा विहानै आएर विचौलियाले घुसको व्रिफकेस छाड्छन्, आफ्नो विरुद्धमा प्रमाण जुटेपछि बर्खास्त हुनुपर्नेमा प्रधानमन्त्रीसँग मिठा कुरा गरेर मन्त्री मन्त्रीपरिषद बैठकमा भाग लिन्छन् । सदनमा विपक्षी कर्मकाण्डी राजिनामा माग्छन् तथा गठवन्धनका सहयात्री…

— Dr Shekhar Koirala (@Shekharnc) July 15, 2025