भदौ १५ सम्म उमेदवार सिफारिस गर्न पोखरेलको पत्र

काठमाडौं । सांसद दीपक बोहोराको निधन भएपछि रिक्त भएको रुपन्देही निर्वाचन क्षेत्र नं ३ को उपनिर्वाचनका लागि उमेदवार सिफारिस गर्न नेकपा एमालेले आग्रह गरेको छ । 

निर्वाचनको तयारीका लागि एक महिलासहित तीनजना उमेदवार को नाम सिफारिस गर्न जिल्ला र प्रदेश कमिटीलाई एमाले महासचिव शंकर पोखरेलले पत्र पठाएका छन् । 

महासचिव पोखरेलले लेखेको पत्रमा उमेदवार सिफारिस गर्दा निर्वाचन क्षेत्र समन्वय कमिटीले जिल्ला र प्रदेश कमिटीसँग पनि राय लिन भनिएको छ ।  पत्रअनुसार जिल्ला कमिटीले निर्वाचन क्षेत्रीय समन्वय कमिटीलाई उमेदवार सिफारिसका लागि जानकारी गराउनेछ । 

केन्द्रीय कार्यालय प्रमुख डा.भिष्म अधिकारीका अनुसार बुधबार दुवै कमिटीलाई पत्राचार गरेर भदौ १५ भित्र उमेदवारको नाम पठाइसक्न निर्देशन गरिएको छ । 

मातहतका कमिटीबाट आएका नामलाई पार्टी केन्द्रीय सचिवालयले एकजनाको नाममा निर्णय गर्ने डा. अधिकारीले बताए । सो क्षेत्रमा २०७९ को निर्वाचनमा एमालेको समर्थनमा राप्रपाका बोहोरा विजयी भएका थिए । 
 
२०७९ मंसिर ४ गते भएको निर्वाचनमा निर्वाचित भएका  बोहराको निधन भएपछि सो पद रिक्त भएको छ । 

निर्वाचन आयोगले कात्तिक १७ गते उक्त क्षेत्रमा उपनिर्वाचनको मिति घोषणा गरिसकेको छ ।