नेतान्याहु र गाजा युद्धप्रति इजरायलीहरूमा बढ्दो असन्तुष्टि
काठमाडौं । हजारौँ इजरायली प्रदर्शनकारीहरूले आइतबार एकदिने हड्ताल गर्दै देशलाई ठप्प पार्ने सडकहरू अवरुद्ध गरे र व्यवसायहरू बन्द गराए । प्रदर्शनलाई तितरवितर गर्न इजरायली प्रहरीले पानीका फोहराबाट भीडलाई प्रहार गर्यो र दर्जनौँलाई गिरफ्तार गर्यो । बन्धकहरूका परिवारहरूको प्रतिनिधित्व गर्ने समूहहरूले यी प्रदर्शनहरू आयोजना गरेको स्काइ न्युजले बताएको छ ।
आइतबारका लागि आह्वान गरिएका प्रदर्शनहरूलाई गाजामा बन्धक बनाइएका परिवारहरूसँग इजरायली एकताको दिन र युद्ध रोक्न तथा बन्धकहरूलाई घर फर्काउने आह्वानको रूपमा घोषणा गरिएको द न्युयोर्क टाइम्सले जनाएको छ । उनीहरूले गाजामा बन्धकहरूलाई मुक्त गर्न हमाससँग सम्झौताको माग गरेका थिए ।
गाजाका सबैभन्दा बढी जनसंख्या भएका क्षेत्रहरूमा नयाँ सैन्य आक्रमणको योजनाका कारण बाँकी बन्धकहरूलाई थप खतरा पार्न सक्ने भन्दै इजरायलमा असन्तुष्टि बढ्दै गएको छ ।
हमासको कब्जामा अझै पनि ५० बन्धकहरू बाँकी छन्, र तीमध्ये २० जना अझै जीवित रहेको विश्वास गरिएको छ । “हामी बन्धकहरूका शवमाथि युद्ध जित्दैनौँ,” प्रदर्शनकारीहरूले २२ महिनाको युद्धमा सबैभन्दा ठूलो र उग्र प्रदर्शन गरे ।
सर्वसाधारण मात्र नभएर केही पूर्वइजरायली सेना र गुप्तचर प्रमुखहरूले अब लडाइँ समाप्त गर्ने सम्झौताको आह्वान गरिरहेका छन् । प्रदर्शनकारीहरू दर्जनौँ स्थानहरूमा जम्मा भएका थिए । जसमा राजनीतिज्ञहरूका घरबाहिर, सैन्य मुख्यालयहरू र प्रमुख राजमार्गहरू समावेश छन् ।
उनीहरूले लेनहरू अवरुद्ध गरे र आगो बाले । केही रेस्टुरेन्टहरू र थिएटरहरूले पनि ऐक्यबद्धता जनाए । धेरै व्यवसायहरूले पनि हड्ताललाई समर्थन गरे र कार्यकर्ता तथा समर्थकहरूका समूहहरूले प्रमुख राजमार्गहरू अवरुद्ध गरेपछि प्रदर्शनहरू रातिसम्म जारी रहे । दर्जनौँलाई गिरफ्तार गरियो ।
एक प्रदर्शनकारीले गाजाबाट प्राप्त भएको एक कमजोर प्यालेस्टाइनी बच्चाको फोटो बोकेका थिए । यस्ता तस्बिरहरू इजरायली प्रदर्शनहरूमा पहिले दुर्लभ थिए तर अब बढी देखिन थालेका छन् । किनकि, त्यहाँका नागरिकहरूको अवस्थाप्रति रोष बढ्दै गएको छ जसमा २५० भन्दा बढी कुपोषणसम्बन्धी मृत्युहरू भएका छन् ।
यसरी लाखौँ मानिसहरूको सहभागितामा भएको विशाल र्यालीले धेरै इजरायलीहरू र प्रधानमन्त्री बेन्जामिन नेतान्याहुको अलोकप्रिय, कट्टरपन्थी सरकारबीचको ठूलो खाडललाई उजागर गरेको द न्युयोर्क टाइम्सले जनाएको छ । तेल अभिभमा भएको सहभागिताको मापनले नेतान्याहुमाथि बढ्दो दबाबको संकेत गर्दछ ।
अक्टोबर ७, २०२३ मा हमासको नेतृत्वमा भएको आक्रमणबाट सुरु भएको गाजामा इजरायलको बढ्दो विवादास्पद र विस्तारित आक्रमणको दुई वर्ष पुग्न लाग्दा पनि नेतान्याहु जनभावनाप्रति लगभग उदासीन रहँदै आएका छन् । इजरायली जनता विशेष गरी इजरायली सरकारले गाजामा घोषित लक्ष्यहरूमा विभाजित छन् ।
हमासलाई सैन्य र शासक शक्तिको रूपमा समाप्त गर्ने र बाँकी ५० बन्धकहरूलाई मुक्त गर्ने, जसमध्ये करिब २० जना जीवित रहेको इजरायलले विश्वास गरेको छ ।
धेरै विज्ञहरूले यी दुई लक्ष्यहरू एकैसाथ हासिल गर्न नसकिने र विरोधाभासी भएको तर्क गरेका छन् । उनीहरूका अनुसार, बन्धकहरूलाई मुक्त गर्ने एक मात्र व्यावहारिक तरिका हमाससँग वार्ता गर्नु हो तर यो अतिवादी समूहले आफ्नो अस्तित्वको सर्तमा बन्धकहरूको मुक्तिलाई जोडेको छ ।
आइतबारका प्रदर्शनकारीहरूको मुख्य माग सरकारले बन्धकहरूलाई घर फर्काउने कार्यलाई प्राथमिकता दिनुपर्ने थियो । यो यस्तो समयमा आएको छ जब इजरायली सरकार र सेना अन्तर्राष्ट्रिय निन्दा, भयावह मानवीय संकट र यस अभियानले बन्धकहरूको जीवनलाई थप खतरामा पार्न सक्ने चिन्ताका बीच गाजा सहर र सम्भवतः सम्पूर्ण क्षेत्र कब्जा गर्ने योजनासँग अघि बढिरहेका छन् ।
“अक्टोबर आक्रमणदेखि दुई वर्ष नजिकिँदै गर्दा यी दुवै लक्ष्यहरूलाई एकैसाथ हासिल गर्ने प्रयास अब वैध छैन,” जेरुसेलममा रहेको गैरदलीय अनुसन्धान समूह इजरायल डेमोक्रेसी इन्स्टिच्युटका अध्यक्ष योहनान प्लेस्नरले न्युयोर्क टाइम्ससँग भने ।
“हमासलाई पराजित गर्न धेरै महिना र वर्ष लाग्न सक्छ, तर बन्धकहरूलाई फर्काउने समयसीमा उस्तै छैन,” उनले थपे ।
बन्धकहरूका अपहरणकर्ताहरूद्वारा जारी गरिएका दुई बन्धकहरूका हालैका भिडियोहरूले उनीहरूलाई कमजोर अवस्थामा देखाएको र यसले इजरायलीहरूलाई चिन्तित तुल्याउनुका साथै उनीहरू कति समयसम्म जीवित रहन सक्छन् भन्ने प्रश्न उठाएको बताइएको छ ।
तर, प्लेस्नरले अर्को अन्तर्निहित विरोधाभासमा उल्लेख गर्दै नेतान्याहु जति अलोकप्रिय हुँदै जान्छन् र मत सर्वेक्षणमा कम समर्थन पाउँछन्, त्यति नै दक्षिणपन्थी सत्तारूढ गठबन्धन सहयोगीहरू युद्ध समाप्त गर्ने कुराको विरोध गर्छन् । दक्षिणपन्थी सत्तारूढ गठबन्धन साझेदारहरूबिना उनी सत्तामा रहन सक्दैनन् र यसका लागि नेतान्याहुलाई उनीहरूको निरन्तर समर्थन चाहिन्छ ।
त्यसैले प्लेस्नर भन्छन्, “प्रदर्शनहरू अहिले कम महत्त्वपूर्ण छन् र गठबन्धनभित्रको राजनीति बढी प्रभावकारी हुन्छ ।”
-1760598750.jpeg)
