प्यालेस्टिनीहरू गाजा सहर छोड्न बाध्य, कस्तो छ अवस्था ?

काठमाडौं । खतराको बाबजुद पनि गाजामा मानिसहरू घर छोड्न बाध्य छन् । इजरायली सेनाले गाजा सहर कब्जा गर्ने उद्देश्यले गरिएको ठूलो आक्रमणको एक भागको रूपमा स्थलगत कारबाही सुरु गरेको छ । यसपछि, हजारौँ परिवारहरू गाजा सहर छोड्दैछन् ।

सहरको शेख रदवान क्षेत्रकी तीन सन्तानकी आमा ३२ वर्षीया लीना अल–मघरेबीले खतराको बाबजुद पनि सुरुमा आफ्नो घर छोड्न अस्वीकार गरिरहेकी थिइन् ।

तर, उनलाई एक इजरायली अधिकारीको फोन आयो जसले उनलाई घर खाली गर्न आदेश दिए । यसपछि उनले आफ्नो घर छोड्नु पर्‍यो । 

इजरायली प्रधानमन्त्री बेन्जामिन नेतन्याहूले गाजा सहरमा ‘शक्तिशाली अपरेशन’ सुरु गरिएको बताएका छन् । यसलाई उनले हमासको अन्तिम प्रमुख गढको रूपमा वर्णन गरेका छन् ।

इजरायली सेनाले स्थानीय मानिसहरूलाई त्यहाँबाट जानका लागि अल–रशिद तटीय सडक मात्र स्वीकृत गरेको छ ।

धेरै मानिसहरूले यस मार्गमा भारी ट्राफिक जाम र सवारी साधन तथा ट्रकहरूको लामो लाइनहरू भएको खबर गरेका छन् । माथिबाट हवाई हमला जारी रहँदा मानिसहरू सडकको छेउमा अलपत्र परेको बीबीसीले जनाएको छ ।