ट्रम्पको भ्रमणअघि उत्तर कोरियाले गर्यो धेरै ब्यालेस्टिक क्षेप्यास्त्र प्रक्षेपण
सियोल । उत्तर कोरियाले बुधबार बिहान धेरैवटा छोटो दूरीका ब्यालेस्टिक क्षेप्यास्त्र प्रहार गरेको छ । यो प्रक्षेपण अमेरिकी राष्ट्रपति डोनाल्ड ट्रम्पलगायत विश्व नेताहरू दक्षिण कोरियामा हुने शिखर सम्मेलनका निम्ति आउनु एक हप्ताअघि गरिएको पहिलो परीक्षण हो ।
दक्षिण कोरियाका ज्वाइन्ट चिफ्स अफ स्टाफका अनुसार, ‘छोटो दूरीका ब्यालेस्टिक मिसाइल मानिएका धेरै प्रोजेक्टाइल’ पत्ता लगाइएको छ । ती मिसाइल राजधानी प्योङयाङको दक्षिणी क्षेत्रबाट बुधबार बिहान करिब ८ः१० बजे (मंगलबार २३१० जिएमटी) प्रक्षेपण गरिएको थियो ।
सियोलको सेनाले ती क्षेप्यास्त्र करिब ३५० किलोमिटर (२१७ माइल) दूरीमा उडेको जानकारी दिएको छ ।
दक्षिण कोरियाका राष्ट्रपति ली जे–म्युङले पदभार सम्हालेपछि यो पहिलोपटक गरिएको क्षेप्यास्त्र परीक्षण हो ।
यसैबीच, अमेरिकी राष्ट्रपति ट्रम्पले उत्तर कोरियाली नेता किम जोङ–उनसँग सम्भावित भेटबारे संकेत गरेका छन् । उनले आफ्नो पहिलो कार्यकालमा किमसँग भएका उच्चस्तरीय बैठक स्मरण गर्दै यो वर्ष पुनः वार्ताको आशा व्यक्त गरेका हुन् ।
उत्तर कोरियाको सरकारी मिडियाले पनि किमबाट भविष्यको संवादका ढोका खुला रहेको संकेत गर्दै अमेरिकालाई ‘प्योङयाङले आणविक हतियार त्याग्ने भ्रमपूर्ण माग छाड्न’ चेतावनी दिएको छ ।
प्योङयाङले यसअघि रुस र चीनका शीर्ष अधिकारीको उपस्थितिमा आयोजित सैन्य परेडमा आफ्नो ‘सबैभन्दा शक्तिशाली’ अन्तरमहाद्वीपीय ब्यालेस्टिक मिसाइल ह्वासोङ–२० प्रदर्शन गरेको थियो । त्यहाँको राज्य मिडियाले उक्त मिसाइलको प्रहार दूरी ‘कुनै सीमा थाहा छैन’ भनेर दाबी गरेको थियो ।
सेप्टेम्बरमा किमले लामो दूरीका आणविक क्षेप्यास्त्रका निम्ति प्रयोग हुने ठोस इन्धन इन्जिनको परीक्षण निरीक्षण गरेका थिए । राज्य मिडियाका अनुसार, यो नवौँ र अन्तिम परीक्षण थियो, जसले निकट भविष्यमा नयाँ आईसीबीएमको पूर्ण परीक्षण हुने संकेत गरेको छ ।
सियोलस्थित इव्हा वुमेन्स युनिभर्सिटीका प्राध्यापक पार्क वोन–गोनका अनुसार, यो प्रक्षेपण राष्ट्रपति ट्रम्प र उनका पछिल्ला गतिविधिको प्रत्यक्ष प्रतिक्रिया हो । उनले भने, “किम जोङ–उनले सियोलमा हुने कार्यक्रमका बीच आफ्नो शासनको शक्ति र उपस्थिति देखाउने प्रयास गर्दै हुनुहुन्छ, जसरी उहाँले पहिले पनि गरिसक्नुभएको छ ।”
ट्रम्प यही अक्टोबर २९ मा एसिया–प्यासिफिक इकोनोमिक कोअपरेसन (एपेक) सम्मेलनमा सहभागी हुन दक्षिण कोरिया पुग्ने कार्यक्रम छ ।
उत्तर कोरियाले लामो समयदेखि अमेरिकी भू–भागसम्म पुग्ने क्षमताका मिसाइलको परीक्षण गर्दै आएको छ । प्योङयाङले बारम्बार आफ्नो आणविक कार्यक्रम त्याग्ने कुनै योजना नरहेको जनाउँदै आएको छ ।
किमले अमेरिकी नेतासँगको अघिल्ला तीन उच्चस्तरीय बैठक स्मरण गर्दै सेप्टेम्बरमा भनेका थिए, “यदि, संयुक्त राज्य अमेरिकाले आणविक निःशस्त्रीकरणको भ्रम त्याग्छ र सहअस्तित्वको चाहना राख्छ भने शान्तिको बाटो असम्भव छैन ।”
प्योङयाङले संयुक्त राष्ट्रसंघको कडा प्रतिबन्धको सामना गरिरहेको छ । तर, उसले रुस र चीनसँगको पुरानो साझेदारीलाई अझ बलियो बनाउँदै आएको छ । रासस/एएफपी
-1760598750.jpeg)
