पाकिस्तान–अफगानिस्तान सीमामा फेरि झडप, ३० जनाको मृत्यु

काठमाडौं । टर्कीको इस्तानबुलमा शान्ति वार्ता जारी रहँदा पाकिस्तान–अफगानिस्तान सीमामा झडप भएको छ । पाकिस्तानको इन्टर–सर्भिस पब्लिक रिलेसन्सले आइतबार जारी गरेको विज्ञप्तिअनुसार उक्त झडपमा पाँच पाकिस्तानी सैनिक र २५ विद्रोही लडाकु मारिएका छन् ।

यो घटना दुई छिमेकी राष्ट्रबीच वर्षौंदेखि जारी घातक द्वन्द्व अन्त्य गर्ने उद्देश्यले इस्तानबुलमा भइरहेका शान्ति वार्ताको क्रममा भएको हो ।

इन्टर–सर्भिस पब्लिक रिलेसन्सको विज्ञप्तिअनुसार शुक्रबार र शनिबार लडाकुहरूले अफगान भूमिबाट पाकिस्तानका कुर्म र उत्तरी वजिरिस्तान जिल्लामा घुसपैठ गर्ने प्रयास गरेका थिए ।

पाकिस्तानी सेनाले यी दुर्गम उत्तर–पश्चिमी सीमा क्षेत्रहरूमा भएका घुसपैठ प्रयासहरू सफलतापूर्वक विफल पारेको विज्ञप्तिमा थप भनिएको छ ।

इन्टर–सर्भिस पब्लिक रिलेसन्सले विशेष गरी अफगान भूमिबाट आतंकवादी गतिविधि रोक्ने बारम्बार गरेको प्रतिबद्धतापछि यी आक्रमणका प्रयासहरूले अफगान सरकारको नियतमाथि शंका उत्पन्न गरेको थप जनाएको छ ।  

यद्यपि, बेलायती समाचार एजेन्सी रोयटर्सका अनुसार अफगानिस्तानको तालिबान सरकारले तत्काल टिप्पणीका लागि गरिएको अनुरोधमा कुनै प्रतिक्रिया दिएको छैन ।

तालिबानले लडाकुहरूलाई आश्रय दिएको आरोप निरन्तर अस्वीकार गर्दै आएको छ । पाकिस्तानले सीमापार सैन्य कारबाही गरेर अफगानिस्तानको सार्वभौमसत्ता उल्लंघन गरेको आरोप लगाउँदै आएको छ ।
यस महिनाको सुरुआतमा दुई सेनाबीच भएको झडपपछि थप तनाव बढ्न नदिन पाकिस्तानी र अफगान अधिकारीहरूले इस्तानबुलमा भेटघाट सुरु गरेका थिए ।

यो पछिल्लो घटना सन् २०२१ मा तालिबानले काबुल कब्जा गरेपछि दुई देशबीच भएको सबैभन्दा घातक सीमा द्वन्द्व हो ।

पाकिस्तानले लामो समयदेखि काबुललाई अफगान भूमिमा रहेका र सीमापार आक्रमण गर्ने लडाकुहरूविरुद्ध कारबाही गर्न आग्रह गर्दै आएको छ ।

हालैका लडाकु आक्रमणहरूमा २३ भन्दा बढी पाकिस्तानी सैनिक मारिएपछि पाकिस्तानी सेनाले काबुल र अर्को अफगान प्रान्तमा हवाई आक्रमण गरेको थियो ।

यसले दुवै पक्षबाट प्रतिशोधात्मक आक्रमणहरूलाई निम्त्याएको थियो । शत्रुता अन्त्य गर्न दुवै राष्ट्रले गएको आइतबार दोहामा युद्धविराम सम्झौतामा हस्ताक्षर गरेका थिए ।

शनिबार पाकिस्तानका रक्षा मन्त्री ख्वाजा आसिफले युद्धविराम कायम रहेको बताउँदै अफगानिस्तानले शान्ति चाहेको विश्वास व्यक्त गरे । यद्यपि, उनले इस्तानबुलमा अन्तिम सम्झौता नहुँदै अफगानिस्तानसँग युद्ध भड्किन सक्ने चेतावनी पनि दिएका छन् ।

पाकिस्तानी सेनाले आक्रमणकारीहरूलाई ‘फित्ना अल–खारिज’नामक समूहका सदस्यको रूपमा पहिचान गरेको छ ।

पाकिस्तानी अधिकारीहरूका अनुसार, विदेशी प्रायोजकहरूको समर्थन प्राप्त र अतिवादी विचारधाराबाट प्रभावित लडाकु संगठनहरूलाई यस शब्दद्वारा जनाइन्छ । डेली अब्जरबर