सुडानमा आरएसएफद्वारा तीन दिनमा १५ सय मानिसको हत्या

काठमाडौं । सुडानको पश्चिमी डार्फर क्षेत्रको एल–फासेर सहरमा हालै विद्रोही अर्धसैनिक बल र्‍यापिड सपोर्ट फोर्सेजले कब्जा गरेपछि भएका आक्रमणहरूमा १५ सय मानिसको हत्या भएको छ । 

देशको सत्ता कब्जाका लागि सुडानी सेनासँग लडिरहेको आरएसएफले तीन दिनमा घेराबन्दी गरिएको सहरबाट भाग्न खोज्ने कम्तीमा १५ सय सर्वसाधारणको हत्या गरेको सुडान डक्टर्स नेटवर्कले बुधबार जनाएको छ । 

देशको गृहयुद्धलाई ट्रयाक गर्ने यो समूहले स्थितिलाई ‘एक वास्तविक नरसंहार’ भनेर चित्रण गरेको छ । समूहले भन्यो, “विश्वले आज देखिरहेको नरसंहार डेढ वर्षअघि एल–फासेरमा भएको घटनाको विस्तार हो, जब बमबारी, भोकमरी, र न्यायिक प्रक्रियाबाहिरको हत्यामार्फत १४ हजारभन्दा बढी सर्वसाधारण मारिएका थिए ।”

समूहले यी आक्रमणहरू हत्या र संहारको जानाजानी र व्यवस्थित अभियानको एक भागको रूपमा भइरहेको बताएको छ ।

यस रणनीतिक क्षेत्रमा भएको सामूहिक हत्याको नयाँ प्रमाण मानवीय अनुसन्धान प्रयोगशालाबाट बाहिर आएको हो । प्रयोगशालाले आरएसएफ प्रवेश गरेपछि खिचिएको एल–फासेरको उपग्रह तस्बिरहरूमा मानव शरीरको आकारसँग मिल्दोजुल्दो वस्तुहरूको समूहका साथै जमिनमा रातो रंगको ठूला दागहरू देखिएको रिपोर्ट गरेको छ ।

आरएसएफ र सुडानी सेनाबीच सन् २०२३ देखि रक्तपातपूर्ण गृहयुद्ध चलिरहेको छ, जसमा हजारौँको मृत्यु र एक करोड २० लाखभन्दा बढी मानिस विस्थापित भएका छन् ।

यो अर्धसैनिक बलले १७ महिनाको घेराबन्दी पछि आइतबार डार्फरमा सेनाको अन्तिम गढ रहेको एल–फासेरमाथि कब्जा जमाएको थियो ।

सुडानी सरकारले बुधबार उक्त सहरमा त्यसयता कम्तीमा दुई हजार मानिस मारिएको बताएको छ । तर, सहायता एजेन्सीहरूले अत्याचारको विश्वसनीय रिपोर्टहरू प्राप्त गरेको बताएका छन् । यी अत्याचारहरूमा भाग्ने क्रममा रहेका सर्वसाधारणमाथि आक्रमण र घर–घरमा छापा मारिएको समाचारमा उल्लेख छ । 

महिला र युवतीहरूविरुद्ध यौन हिंसा भएको छ । एल–फासेरको पतनले आरएसएफलाई विशाल डार्फर क्षेत्र लगभग पूर्णनियन्त्रणमा लिएको बताइएको छ । यसले दक्षिण सुडानको निर्माण भएको एक दशकभन्दा बढी समयपछि सुडान फेरि विभाजित हुने चिन्ता बढाएको छ ।

सुडानी सरकारले बुधबार आरएसएफलाई सहर कब्जा गर्ने क्रममा मस्जिदहरूमा सर्वसाधारणमाथि आक्रमण गरेको आरोप पनि लगाएको छ । अलजजिरा