अफगानिस्तान भूकम्प : २० जनाको मृत्यु, ३२० घाइते

काठमाडौं । अफगानिस्तानको उत्तरी क्षेत्रमा सोमबार बिहान गएको ६.३ म्याग्निच्युडको भूकम्पले ठूलो विनाश निम्त्याएको छ । भूकम्पमा परी कम्तीमा २० जनाको मृत्यु भएको छ । ३२० भन्दा बढी घाइते भएका छन् ।

अमेरिकी भूवैज्ञानिक सर्वेक्षणका अनुसार, भूकम्पको केन्द्र मजार–ए–शरीफ नजिकै २८ किलोमिटरको गहिराइमा थियो । स्वास्थ्य मन्त्रालयले यो जानकारी दिएको हो, यद्यपि यो प्रारम्भिक तथ्यांक मात्रै हो । 

मजार–ए–शरीफका बासिन्दाहरू रातभर घरबाहिर निस्किएका थिए । उनीहरूलाई आफ्ना घरहरू ढल्न सक्ने भय थियो । सहरको ऐतिहासिक निलो मस्जिद (ब्लु मस्क)मा पनि क्षति पुगेको छ, जहाँ एक मिनारको अंश भत्केर मस्जिद परिसरमा छरिएको छ । भूकम्पको केन्द्रबाट करिब ४२० किलोमिटर टाढा रहेको राजधानी काबुलसम्म पनि झट्का महसुस गरिएको थियो ।

तालिबान सरकारका लागि यो अर्को प्राकृतिक विपत्ति हो, जसले सन् २०२१ यता धेरै विनाशकारी भूकम्पको सामना गरेको छ । देश पहिले नै मानवीय संकट, खडेरी, आर्थिक प्रतिबन्धहरू र छिमेकी देशहरूबाट अफगान नागरिकहरूको फिर्ती जस्ता चुनौतीहरूसँग जुधिरहेको छ । खराब सञ्चार व्यवस्था र दुर्गम इलाकाहरूसम्म पुग्न कठिनाइले राहत कार्यहरूमा बाधा पुर्‍याइरहेको छ ।

यसअघि सन् २०२३ मा हेरात र सन् २०२२ मा नंगरहारमा आएका ठूला झट्काहरूले सयौँ मानिसको ज्यान लिएका थिए भने हजारौँ घरहरू नष्ट गरिदिएका थिए ।