बाराका एसपी तामाङलाई हटाइएकामा ओलीको आपत्ति

काठमाडौं । नेकपा (एमाले)का अध्यक्ष केपी शर्मा ओलीले बाराका प्रहरी प्रमुख एवं एसपी सन्तोष तामाङलाई हेडक्वार्टर तानिएकामा आपत्ति जनाएका छन् ।

शनिबार (मंसिर ६) काठमाडौंको भृकुटीमण्डपमा आयोजित पार्टीको सभामा उनले ‘जेनजी’लाई सघाएन भनेर एसपी हटाइएको भन्दै आपत्ति प्रकट गरे ।

“जेनजीलाई सघाएन भनेर एसपीलाई तानियो । यो तमासा होइन ? त्यहाँ एयरपोर्ट बन्द गराउने नाटक गराउन कुनै जेनजी आएको थिएन,” उनले भने । 

प्रहरी जेनजी बनेर आइदिनुपर्ने ? भन्दै उनले प्रश्न समेत गरे । उनले सरकारलाई प्रहरी पनि एमालेजस्तो लाग्न थालेको बताए ।

“अब उहाँहरूलाई पुलिस पनि एमाले लाग्न थाल्यो । अब उहाँहरूलाई अदालत, कर्मचारी, सेना एमाले लाग्न थाल्छ,” ओलीले भने ।

बाराको सिमरामा झडप, तनाव र जेनजीसँग स्थानीय प्रशासनको छलफलपश्चात् प्रहरी प्रधान कार्यालयले शुक्रबार (मंसिर ५) त्यहाँका एसपी तामाङलाई हटाएको थियो । त्यहाँ अर्का एसपी नरेन्द्र कुँवरलाई पठाइएको छ ।