बलात्कार गरेको अभियोगमा इरानमा एकजनालाई 'सार्वजनिक' रूपमा मृत्युदण्ड

काडमाडौं । इरानले सेमनान प्रान्तमा दुई महिलालाई बलात्कार गरेको अभियोगमा दोषी ठहर गरिएका एक व्यक्तिलाई नोभेम्बर २५ मा सार्वजनिक रूपमा मृत्युदण्ड दिएको छ ।

इरानको न्यायपालिकाको आधिकारिक आउटलेट मिजान अनलाइन का अनुसार, सर्वोच्च अदालतले फैसला सदर गरेपछि बास्तम सहरमा मृत्युदण्डको फैसला कार्यान्वयन गरिएको थियो ।

मिजानले प्रान्तीय न्यायपालिकाका प्रमुख मोहम्मद अकबरीलाई उद्धृत गर्दै भनेको छ, "सर्वोच्च अदालतबाट सूक्ष्म समीक्षापछि फैसलाको पुष्टि र कार्यान्वयन गरिएको हो ।"

प्रान्तीय अधिकारीले ती व्यक्तिले दुई महिलालाई धोका दिएर बल र करकापमा बलात्कार गरेको बताएका छन् । उनले पीडितहरूलाई सामाजिक प्रतिष्ठामा हानि पुग्ने डर देखाउँदै धम्की दिएको पनि उल्लेख गरिएको छ ।

मृत्युदण्ड पाउने व्यक्तिको पहिचान र सजाय सुनाइएको मिति भने तत्काल सार्वजनिक गरिएको छैन ।

इरानले सामान्यतया जेलभित्रै मृत्युदण्ड दिने गरे पनि, हत्याको अभियोगमा दोषी ठहर एक व्यक्तिलाई सार्वजनिक रूपमा फाँसी दिएको दुई सातापछि यो नयाँ मृत्युदण्ड सार्वजनिक रूपमा कार्यान्वयन गरिएको हो ।

एमनेस्टी इन्टरनेसनलसहितका मानवअधिकार समूहका अनुसार, आफ्ना धेरैजसो दोषीहरूलाई फाँसीद्वारा मृत्युदण्ड दिने इस्लामिक गणतन्त्र इरान चीनपछि विश्वमा दोस्रो सबैभन्दा बढी मृत्युदण्ड कार्यान्वयन गर्ने राष्ट्र हो । एएफपी