रूस–युक्रेन युद्ध अन्त्य गर्ने ‘ट्रम्प शान्ति योजना’मा संशोधन, के–केमा भयो सहमति ?

काठमाडौं । रूस–युक्रेन युद्ध अन्त्य गर्ने विषयमा स्विट्जरल्यान्डको जेनेभामा भएको वार्तापछि ‘ट्रम्प शान्ति योजना’मा संशोधन गरिएको छ ।

वार्तापछि युक्रेन र अमेरिकाले जारी गरेको संयुक्त वक्तव्यमा ‘अद्यावधिक वा संशोधित शान्ति योजना’को उल्लेख गरिएको छ । 

आइतबार अमेरिका, जर्मनी, फ्रान्स, बेलायत र युक्रेनका प्रतिनिधिहरूबीच छलफल भएको थियो । यसअघि, अमेरिकाले एक शान्ति योजनाको प्रस्ताव गरेकोमा सो प्रस्तावलाई ‘रूसको पक्षमा ढल्केको’ भनिएको थियो ।

फाइनान्सियल टाइम्सले एक प्रतिनिधिलाई उद्धृत गर्दै नयाँ योजनामा समावेश गरिएका १९ बुँदाहरू सुरुको प्रस्तावबाटै लिइएको भए पनि नयाँ अद्यावधिक शान्ति योजनाको बारेमा धेरै जानकारी नभएको भनिएको छ । रोयटर्स समाचार संस्थाका अनुसार, यसमा युक्रेनमा पश्चिमी देशहरूले स्थायी रूपमा सेना तैनाथ गर्न पूर्ण रूपमा प्रतिबन्ध नलगाएको बताइएको छ ।

नयाँ अद्यावधिक योजनाअनुसार रूसले डोनबास क्षेत्र निःशुल्क नपाउने र युक्रेनले आफूबाट कब्जा गरिएका इलाकाहरू फिर्ता प्राप्त गर्न कूटनीतिक मार्ग अख्तियार गर्न सक्ने उल्लेख छ । युद्ध अपराधको लागि पूर्ण क्षमादान समेत हटाइएको छ । यस वार्तालाई लिएर अमेरिकी विदेशमन्त्री मार्को रुबियोले ‘धेरै प्रगति’ भएको बताएका छन् ।

युद्ध अन्त्यको वार्ताबीच एकअर्काविरुद्ध हमला
युद्ध अन्त्य गर्ने ‘ट्रम्पको शान्ति योजना’मा भइरहेका छलफलबीच नै युक्रेन र रूसले एकअर्काका सहरहरूमा ठूला हमलाहरू गरेका छन् ।

युक्रेनको राजधानी किभका मेयर भिटाली क्लिच्कोले रूसी हमलामा ६ जना मारिएको बताएका छन् । यसअघि अधिकारीहरूले कम्तीमा दुईवटा आवासीय ब्लकहरूमा हमला भएको बताएका थिए ।

यता, रूसी अधिकारीहरूको भनाइमा क्रास्नोडार र रोस्तोवको सीमाना क्षेत्रहरूमा युक्रेनले रातभर हवाई हमला गरेको छ । 

रूसी रक्षा मन्त्रालयको दावीअनुसार, रूसी सेनाले २४९ युक्रेनी ड्रोन प्रहार गरेको छ । रोस्तोव क्षेत्रका कार्यकारी गभर्नरको भनाइमा यी हमलामा कम्तीमा तीनजना मारिएका छन् ।

एक अमेरिकी अधिकारीले बीबीसीलाई पुष्टि गर्दै शान्ति योजनाको मस्यौदामा जेनेभामा भएको छलफलपछि अबुधाबीमा रूसी प्रतिनिधिहरूसँग बैठक हुने बताइएको छ ।