आसिम मुनिर पाकिस्तानको पहिलो सीडीएफ नियुक्त

काठमाडौं । पाकिस्तानका राष्ट्रपति आसिफ अली जरदारीले बिहीबार फिल्ड मार्शल आसिम मुनिरलाई देशको पहिलो चिफ अफ डिफेन्स फोर्सेज (सीडीएफ) नियुक्त गर्ने औपचारिक स्वीकृति दिएका छन् । उनलाई यो पद पाँच वर्षको कार्यकालका लागि दिइएको छ ।

प्रधानमन्त्री शहबाज शरिफले पठाएको सिफारिस पत्रमा सेना प्रमुख र सीडीएफ दुवै पदमा नियुक्त गर्न अनुरोध गरिएकोमा राष्ट्रपतिले यो स्वीकृति दिएका हुन् ।

नयाँ संवैधानिक संशोधनअन्तर्गत पद सिर्जना
गत महिना पाकिस्तानको संसद्ले २७औँ पटक संविधान संशोधन पारित गरेको थियो, जसअन्तर्गत सीडीएफको पद सिर्जना गरिएको हो । यो पदको उद्देश्य देशको रक्षा संरचनामा एकीकृत कमान्ड सुनिश्चित गर्नु र जरुरी परिस्थितिमा छिटो निर्णय प्रक्रिया बलियो बनाउनु हो ।

सीडीएफ पदले चेयरम्यान, जोइन्ट चिफ अफ स्टाफ कमिटी (सीजेएससी)को स्थान लिएको छ, जुन पद अब हटाइएको छ ।

प्रधानमन्त्री कार्यालयको विज्ञप्ति अनुसार, प्रधानमन्त्रीले पहिले आसिम मुनिरलाई सेना प्रमुख र सीडीएफ दुवै पदमा नियुक्त गर्ने प्रस्ताव मन्जुर गरेका थिए । 

आसिम मुनिरलाई नोभेम्बर २०२२ मा सेना प्रमुख नियुक्त गरिएको थियो । त्यस समय उनको कार्यकाल तीन वर्षको थियो । तर, २०२४ मा यसलाई बढाएर पाँच वर्ष पारिएको थियो । डनबाट ।