आकाशमा चीन र रुसको संयुक्त गस्तिपछि अमेरिकाका बमवर्षक विमान पुगे जापान

काठमाडौं । अमेरिकाका परमाणु–सक्षम बमवर्षक विमान र जापानी लडाकू विमानले जापानको सागरमा संयुक्त सैन्य अभ्यास गरेका छन् । 
 
यो घटना चिनियाँ र रुसी सेनाहरूले जापान र दक्षिण कोरियाको वरिपरि संयुक्त सैन्य अभ्यास पूरा गरेको भोलिपल्ट भएको हो ।

जापानको रक्षा मन्त्रालयले भन्यो, “जापान र अमेरिका कुनै पनि स्थितिमा बलद्वारा एकतर्फी परिवर्तनलाई स्वीकार गर्ने छैनन् । हाम्रो रक्षा बल तथा अमेरिकी सेना पूर्ण रूपमा तयार छन् ।”

यस अपरेसनमा दुई अमेरिकी बी–५२ बमवर्षक, तीन जापानी एफ–३५ स्टिल्थ लडाकू र तीन एफ–१५ समावेश थिए ।

जापानले मंगलबार राति नै आफ्ना विमानहरूलाई चिनियाँ र रुसी विमानहरूको संयुक्त गस्ती मिसनमाथि निगरानी राख्न पठाएको थियो । जापानका चिफ अफ स्टाफ, जनरल हिरोआकी उचिकुराले भने, “हामी यसलाई जापानको सुरक्षाको दृष्टिकोणबाट गम्भीर चिन्ताको विषय मान्छौँ ।”

चीन र रूसले आफ्नो अभ्यासलाई सामान्य सैन्य अभ्यास बताएका छन् ।
 
चीनको विदेश मन्त्रालयका प्रवक्ता गुओ जियाकुनले भने, “जापानी पक्षले विनाकारण हल्ला गर्ने वा यसलाई व्यक्तिगत रूपमा लिन आवश्यक छैन ।” रोयटर्सबाट ।