एन्फा यू–१६ युथ लिगमा फ्रेन्ड्सको साँघुरो जित

काठमाडौं । फ्रेन्ड्स क्लबले एन्फा यू–१६ युथ लिगमा संकटा क्लबविरुद्ध साँघुरो जित निकालेको छ । 

शुक्रबार सातदोबाटोस्थित एन्फा मुख्यालयमा सम्पन्न खेलमा फ्रेन्ड्सले संकटाविरुद्ध १–३ को साँघुरो जित निकालेको हो । 

फ्रेन्ड्सको जितमा मन्दीप ढुंगेलले दुई गोल गर्दा प्रभात बिसीले एक गोल गरे । संकटाका पेम्बा तामाङले एक गोल गरे पनि टोलीको हार टार्न सकेनन् । 

खेलको ४५औँ मिनेटमा मन्दीपले फ्रेन्ड्सलाई अग्रता दिलाए । ६५औँ मिनेटमा प्रभातले अग्रतालाई दोब्बर बनाए । 

७०औँ मिनेटमा संकटाका पेम्बाले गोल गर्दै टोलीलाई १–२ को अवस्थामा ल्याए ।

७७औँ मिनेटमा मन्दीपले आफ्नो दोस्रो गोल गर्दै टोलीको जित सुनिश्चित गरे । 

जितसँगै फ्रेन्ड्सले लिगमा ६ अंक जोडेको छ । यसअघि फ्रेन्ड्सले डिफेन्डिङ च्याम्पियन चर्च ब्वाइज युनाइटेडविरुद्ध ७–० को जित निकालेको थियो । उसले अब चौथो खेलमा विभागीय टोली त्रिभुवन आर्मी क्लबसँग खेल्नेछ ।

खेल आगामी असार ३० गते (सोमबार) दिउँसो १ बजे हुने तालिका छ । 

पराजित संकटाले भने चौथो खेल विभागीय टोली एपीएफसँग खेल्नेछ । खेल आगामी असार ३१ गते (मंगलबार) बिहान १० बजे हुनेछ ।