भन्सार छलीका औषधिसहित युवक पक्राउ

विराटनगर । भन्सार छली गरी भारतबाट नेपाल ल्याइएको ठूलो परिमाणका औषधिसहित एक युवकलाई प्रहरीले नियन्त्रणमा लिएको छ ।

मंगलबार (असार ३१) बिहान करिब ५ बजे विराटनगर महानगरपालिका–१६, दरैयास्थित भारत सीमाबाट भन्सार छल्दै नेपाल भित्र्याइएको औषधिसहित स्थानीय २६ वर्षीय सिकन्दर यादवलाई पक्राउ गरिएको जिल्ला प्रहरी कार्यालय मोरङले जनाएको छ ।

मोटरसाइकलमा चार कार्टुनमा राखेर नेपालतर्फ ल्याउँदा गर्दा प्रहरी टोली देखेपछि औषधि फालेर भाग्न खोज्दा उनी पक्राउ परेका हुन् । उनलाई मोटरसाइकल र औषधिसहित नियन्त्रणमा लिइएको प्रहरीले जनाएको छ ।

उनलाई पक्राउ गर्ने क्रममा ओमेगा टाइम ट्याब्लेट २३०, प्रोकल डी ट्याब्लेट ४७ र ट्रमाकल एम ट्याब्लेट ७९२ बट्टा बरामद गरिएको छ । ती सबैमा प्रतिबट्टा ३० ट्याबलेट रहेको जनाइएको छ ।

मोटरसाइकलसहित बरामद गरिएको सामग्रीको मूल्य सात लाख ९० हजार ३०० रुपैयाँबराबर अनुमान गरिएको छ । बरामद औषधि र पक्राउ परेका यादवलाई आवश्यक कारबाहीका निम्ति भन्सार कार्यालय रानीमा पठाइएको छ ।