विराटनगरमा महेन्द्र चोक र प्रशासन कार्यालयअगाडि धर्ना दिँदै जेनजी

विराटनगर । सामाजिक सञ्जाल बन्दको विरोधमा आज कोसी प्रदेशमा जेनजी पुस्ताले शान्तिपूर्ण विरोध प्रदर्शन गर्ने भएका छन् । यो प्रदर्शन विराटनगरसहित इटहरी, धरान, इनरुवा, दमक, बिर्तामोडलगायत  प्रमुख सहरहरूमा हुनेछ । 

विराटनगरमा बिहान ११ बजे जिल्ला प्रशासन कार्यालयअगाडि प्रदर्शन सुरु हुनेछ । दिउँसो महेन्द्र चोकमा ठूलो भेला गरेर प्रदर्शन गर्ने योजना छ । प्रदर्शनका लागि युवाले विभिन्न सामाजिक सञ्जाल प्लेटफर्महरूमार्फत सार्वजनिक आह्वान गरेका छन् ।

सञ्चारमाध्यममा आएको जानकारीअनुसार, सहभागीहरूले हातमा पुस्तक र पम्पलेट बोकेर, कापी–किताब, स्कुल वा कलेजको पोसाकमा उपस्थित हुन अपिल गरिएको छ । प्रदर्शन एकदेखि दुई घण्टासम्म चल्ने बताइएको छ ।

यसबीच, विराटनगरमा सुरक्षा सतर्कता बढाइएको छ । प्रहरीले सम्भावित भीड नियन्त्रणका लागि तयारी अवस्थामा रहेको जनाएको छ ।

सामाजिक सञ्जाल बन्द, अभिव्यक्ति स्वतन्त्रताको हनन् र बढ्दो भ्रष्टाचारविरुद्ध यो प्रदर्शन देशव्यापी बन्दै गएको छ । जेनजी आन्दोलन भनेर चिनिन थालेको यस अभियानमा सहभागी युवाले आज काठमाडौंमा पनि ठूलो प्रदर्शन गर्ने तयारी गरेका छन् । 

प्रधानमन्त्री केपी शर्मा ओलीले भने आज उक्त आन्दोलनलाई राजनीतिक उद्देश्यसहित गरिन लागेको टिप्पणी गरेका छन् । उनले देशमा अस्थिरता सिर्जना गर्न प्रयत्न भइरहेको भन्दै सचेत रहनुपर्ने बताएका छन् ।