नागरिक सरकारसँग काम गर्न ‘ब्युरोक्रेसी’ तयार छ : मुख्यसचिव अर्याल

काठमाडौं । मुख्यसचिव एकनारायण अर्यालले अब बन्ने नागरिक सरकारसँग काम गर्न कर्मचारी प्रशासन तयार रहेको बताएका छन् । शुक्रबार (भदौ २७) सिंहदरबारस्थित भौतिक पूर्वाधारहरूको निरीक्षणपछि सञ्चारकर्मी उनले ‘जेनजी’को मागअनुसार गठन हुने सरकारसँग काम गर्न ‘ब्युरोक्रेसी’ तयार रहेको बताएका हुन् ।

मुलुकका अत्यावश्यक सेवा अबाधित रूपमा सञ्चालन भइरहेको र सेवा प्रवाहलाई अझ प्रभावकारी बनाउन सम्बन्धित निकायलाई निर्देशन दिइएको उनले उल्लेख गरे । राहदानीदेखि वैदेशिक रोजगारसम्बन्धी सम्पूर्ण सेवा अनलाइनमार्फत सुरु भइसकेको उनको भनाइ छ ।

उनले सुरक्षाको जिम्मा नेपाली सेनाले सम्हालिरहेको र हाल सुरक्षास्थिति सामान्यतर्फ उन्मुख रहेको पनि बताए । प्रशासनिक अभिलेखमा अकल्पनीय क्षति पुगेको उनले सुनाए । पूर्वाधार र सवारीसाधनको क्षतिबारे प्राविधिक मूल्यांकन गरिने उनले जानकारी दिए ।

मुख्यसचिव एकनारायण अर्यालको भनाइ पढ्नोस्–
हामीले हिजोदेखि राहदानीदेखि वैदेशिक रोजगारका सबै सेवाहरू अनलाइनबाट सुरु गरिसकेका छौँ । अत्यावश्यक सेवाहरू  खानेपानी, विद्युत् तथा टेलिफोनलगायत जनतालाई दिनुपर्ने सेवाहरूको लागि पनि हामीले तत्तत् निकायहरूलाई निर्देशन दिइसकेका छौँ । हिजो र अस्ति मन्त्रालयका सचिवहरूसँग भर्चुअल माध्यमबाट छलफल गरेर सोहीअनुसार निर्देशन पनि भइसकेको छ । सुरक्षाको सम्बन्धमा नेपाली सेनाको नेतृत्वमा काम भइरहेको छ । र, सुरक्षास्थिति सामान्यउन्मुख छ । अब जेनजी पुस्ताको मागहरूअनुसार सरकार बनोस् । नागरिक सरकारसँग काम गर्नको लागि ब्युरोक्रेसी तयार छ । सरकार आइसकेपछि मन्त्रालयमार्फत हुने सेवाका सम्बन्धमा आज निरीक्षणपछि छलफल पनि गर्‍यौँ । कति क्षति भएको छ त्यसको आकलन गरिसकेपछि क्षति कम भएको ठाउँबाट सेवा प्रवाह गर्ने कुराहरू भइरहेको छ । त्यहीअनुसार हामी काम अगाडि बढाउँछौँ । सरकार सञ्चालनको विषयमा आएको सबै हल्ला हो । सम्भवतः सिंहदरबारबाटै सरकार गठन हुन्छ, त्योअनुसारको व्यवस्थापन हामी गर्छौं । अभिलेखको क्षति कल्पना समेत गर्न सकिँदैन । पूर्वाधार र सवारीको क्षतिबारे प्राविधिक रूपमा आकलन गर्छौं । न्युज एजेन्सी नेपाल