काठमाडौंदेखि धनगढीसम्म हिमालको एक भव्य ग्यालरी !

काठमाडौं । सफा मौसममा काठमाडौंदेखि धनगढीको यात्रा गर्नु भनेको केवल बाटो काट्नु मात्र होइन, हिमालको एक भव्य ग्यालरी अवलोकन गर्नु पनि हो ।

काठमाडौं उपत्यका वरिपरिबाट उत्तरतिर हेर्दा, गणेश हिमाल र लाङटाङ श्रृंखलाका चुचुराहरूले हामीलाई बिदाइ गर्छन् । यी हिमाल यति नजिक र स्पष्ट देखिन्छन् कि मानौँ कसैले सेतो हिउँको ठूलो चित्रकला हाम्रो सामुन्ने टाँगिदिएको छ ।

पश्चिमतिर अघि बढ्दै जाँदा, मध्य नेपालको विशाल दृश्य खुल्छ । आठ हजार मिटरको विशाल मनास्लु हिमाल आफ्नो वरपरका हिमालचुली र ङादी चुली सँगै, आकाशलाई नै छोलाजस्तो गरी उभिएको छ ।

यसपछि यात्राको सबैभन्दा मोहक खण्ड आउँछ, अन्नपूर्ण श्रृंखला । माछापुच्छ्रेको धारिलो चुचुरो, अन्नपूर्ण प्रथम, दोस्रो र तेस्रोका विशाल कायाहरूले आँखालाई चकित पार्छन् । सफा मौसममा, सूर्यको किरण पर्दा यी चुचुराहरू चादिजस्तै टल्किन्छन् र त्यो सौन्दर्यले मुटुलाई नै छोएर जान्छ ।

अझ पश्चिम लागेपछि देखिने धौलागिरीको विशाल भव्यता र यसको सेतो चम्किलो रूपले यात्रालाई अझ रोमाञ्चक बनाइदिन्छ । कहिलेकाहीँ त धौलागिरिभन्दा परको अपि र सैपालजस्ता सुदूरपश्चिमका हिमालहरूको छाया मात्र देखिनु पनि निकै रोमाञ्चक हुन्छ ।

धनगढी पुग्दा नपुग्दै यी हिमाली दृश्यले शान्ति र मनमा खुसीको तरंग उत्पन्न गराइसक्छन् ।

शब्द तस्बिर : प्रकाश चन्द्र तिमिल्सेना ।