पाकिस्तानले जित्यो दक्षिण अफ्रिकाविरुद्धको ट्वान्टी–२० शृंखला

काठमाडौं । पाहुना टिम दक्षिण अफ्रिकाकाविरुद्धको ट्वान्टी–२० अन्तर्राष्ट्रिय शृंखला पाकिस्तानले आफ्नो पक्षमा पारेको छ । शनिबार गद्दाफी अन्तर्राष्ट्रिय क्रिकेट मैदानमा तेस्रो तथा अन्तिम खेलमा पाकिस्तान चार विकेटले विजयी भएसँगै शृंखला २–१ ले जितेको हो ।

शृंखलाको पहिलो खेल दक्षिण अफ्रिकाले ५५ रनले जितेको थियो । दोस्रो खेलमा पाकिस्तान नौ विकेटले विजयी भएको थियो ।

शनिबार दक्षिण अफ्रिकाले प्रस्तुत गरेको १४० रनको लक्ष्य पाकिस्तानले १९ ओभरमा ६ विकेट गुमाउँदै पूरा गर्‍यो । पाकिस्तानको जितमा बाबर आजमले सर्वाधिक ६८ रन बनाए । उनले ४७ बलमा नौ चौका प्रहार गरे । कप्तान सलमान अघाले ३३ र शाहिबजादा फरहानले १९ रन जोडे ।

दक्षिण अफ्रिकाका लिजार्ड विलियम र कोर्बिन बोशले समान दुई विकेट लिए । एन्डिल सिमलेन र कप्तान डोनोभान फरेराले समान एक विकेट लिए ।

त्यसअघि, टस हारेर ब्याटिङको निम्तो पाएको दक्षिण अफ्रिकाले निर्धारित २० ओभरमा नौ विकेट गुमाएर १३९ रन बनाएको थियो । दक्षिण अफ्रिकाका रिजा हेन्ड्रिक्सले ३४ रन बनाए । कोर्बिन बोशले अविजित ३०, डोनोभान फरेराले २९, डिवाल्ड ब्रेभिसले २१ र एन्डिले सिमलेनले १३ रनको योगदान गरे  ।

पाकिस्तानका साहिन साह अफ्रिदीले तीन विकेट लिए । फहिम अशरफ र उस्मान तारिकले समान दुई विकेट लिए । सलमान मिर्जा र मोहम्मद नवाजले एक/एक विकेट लिए ।

अब यी दुई टिमबीच पाकिस्तानमै तीन खेलको एकदिवसीय शृंखला हुँदै छ । शृंखला मंगलबारदेखि शनिबारसम्म हुने तय छ ।