जब पहिलोपटक त्रिविले प्यारापिटमा दर्शक र फ्लडलाइटको अनुभव गर्‍यो

काठमाडौं । गत वर्ष नेपाल प्रिमियर लिग (एनपीएल)को पहिलो संस्करण हुँदा त्रिवि ‘क्रिकेट मैदान’ थियो । एक वर्षपछि त्यही स्थान अहिले ‘क्रिकेट रंगशाला’ बनेको छ । मैदान र रंगशाला छुट्याउने मानक के हुन् भन्ने कौतहला हुनु स्वाभाविक नै हो । एउटा सामान्य मैदानलाई रंगशालाको सम्मान दिने मानकमा पर्छन्, व्यवस्थित प्यारापिट र फ्लडलाइट । सुविधासम्पन्न रंगशाला बन्न अरु धेरै आवश्यकता होलान् । त्रिवि रंगशालाले यी सबैलाई अहिले नै पूरा गर्दैन पनि । तर, मैदानको स्वरुप सामान्य नै भए पनि त्रिविको क्रिकेट मैदान अब रंगशालामा परिणत भएको छ ।

यही रंगशालामा सोमबार (मंसिर १) एनपीएल दोस्रो संस्करणको ऐतिहासिक खेल आयोजना भयो  । जहाँ प्रतिस्पर्धामा थिए, साविक विजेता जनकपुर बोल्ट्स र काठमाडौं उपत्यकाको प्रतिनिधित्व गरिरहेको टोली काठमाण्डू गोर्खाज । 

र, यो ऐतिहासिक खेलको साक्षी बन्न १० हजारभन्दा धेरै समर्थक त्रिवि रंगशालामा उपस्थित रहे । खेतका गह्रा र कान्लामा सिमलको काठबाट बनेको ब्याट बोक्दै क्रिकेट सपना बुनेका नेपाली खेलाडीले सोमबार पहिलो पटक देशमै प्यारापिटमा समर्थक देखे । फ्लडलाइटको उज्यालोमा प्रतिस्पर्धा गरे । 

मधेसको सान बनेको जनकपुर र संघीय राजधानीको प्रतिनिधित्व गरिरहेको काठमाण्डूबीचको प्रतिस्पर्धा नेपाली क्रिकेट इतिहासमै फ्लडलाइट र प्यारापिटमा आयोजना भएको पहिलो खेल बन्यो । क्रिकेटकै भाषामा भन्नुपर्दा नेपालको घरेलु लिगले पहिलो पटक ‘डे–नाइट’ क्रिकेटको अनुभव गर्‍यो । १० हजार दर्शकसामु नतिजा काठमाण्डूले बाजी मार्‍यो । 

“यति धेरै समर्थकमाझ डे–नाइट क्रिकेटको यो अनुभव उत्कृष्ट थियो । फ्लडलाइटमा भएको पहिलो खेल जित्नु भनेको मेरो लागि ऐतिहासिक पल हो,” जितपछि काठमाण्डूका कप्तान तथा मार्की खेलाडी करण केसीले अनुभव सुनाए । 

करणलाई नै प्रश्न थियो, “पहिले मैदानमा खेल्दा र अहिले रंगशालामा खेल्न पाउँदा फरक के पाउनु भयो ?” 

जवाफमा करणले हाँस्दै भने, “अलि बढी चिसो भयो ।” 

यही ऐतिहासिक क्षणबारे जनकपुरका कप्तान अनिल साहले भने, “पहिलोपटक नेपालमा डे–नाइट खेल खेलिरहेका छौँ । त्यो पनि टीयूमा । सबैको सपना थियो, त्यो पूरा भयो ।”

जनकपुरको फितलो ब्याटिङमा आसिफको अर्धशतक
टस हारेपछि फिल्डिङ रोज्ने कप्तानको निर्णयलाई बलरहरूले सही सावित गर्दा काठमाण्डूले जनकपुरलाई १३० रनको मध्यम योगफलमै रोकेको थियो । जनकपुरले २० ओभरमा पाँच विकेट गुमायो ।

ब्याटिङमा निम्त्याइएको जनकपुरबाट ओपनर आसिफ सेखबाहेकको प्रदर्शन उल्लेखनीय बन्न सकेन । क्रिजको एक एन्डबाट अर्धशतकीय इनिङ खेलेका आसिफ ५४ रन बनाएर पभेलियन फर्किए । गत वर्ष च्याम्पियन बन्दा जनकपुरको महत्त्वपूर्ण सदस्य रहे पनि आसिफको यो प्रतियोगितामै पहिलो अर्धशतक हो । आसिफले पहिलो खेलमा ४१ बलको सामना गर्दा ६ चौका र एक छक्का प्रहार गरे । पहिलो विकेट ३४ रनमा गुमाएको जनकपुरले कुनै पनि समय बलियो साझेदारी बनाउन सकेन । 

७८–५ को स्थितिबाट मध्यक्रम ब्याटर मयन यादव र लहिरु समराकुनले ४८ रनको साझेदारी गरे पनि गतिलो फिनिसिङ दिन सकेनन् । मयनले ३४ र समराकुनले २२ रन थपे । अरु खेलाडी दोहोरो अंकसम्म पनि पुग्न सकेनन् । कप्तान अनिलकुमार साह दुई बल खेल्दा ‘डक’ भए । ओपनर लहिरु मिलान्थाले सात रन जोडे । रुपेश सिंह चार रनमा अविजित रहँदा जान निकोल लोफ्टी इटोन र सञ्जय कृष्णमुर्थीले समान दुई रन थपे । जनकपुर १३० रनमै रोकियो । 

जनकपुरलाई मध्यम योगफलमा रोक्न काठमाण्डूका मिलिन्द कुमारले तीन विकेट लिए । चार ओभरमा १५ रनमात्रै खर्चिदा उनको इकोनोमी रेट चारभन्दा तल रह्यो ।

१३१ रनको मध्यम लक्ष्य पछ्याएको काठमाण्डूका ब्याटरले कुनै पनि समय दबाब महसुस गरेनन् । ओपनिङ जोडी आकाश त्रिपाठी र बेन चाल्र्सवर्थले ८.१ ओभरमा ७० रनको आक्रामक सुरुआत दिलाउँदा काठमाण्डूको ‘रन चेज’ झनै सहज बन्यो । अर्धशतक बनाउन चार रनलेमात्र चुकेका चाल्र्सवर्थले २०० को स्ट्राइक रेटमा ब्याटिङ गर्दै ४६ रन बनाए । यसक्रममा उनले पाँच चौका र तीन छक्का प्रहार गरे । अर्का ओपनर आकाशले ३९ रन थपे । मिलिन्द कुमारले १९ र विकेटकिपर ब्याटर जोन सिम्पसनले १३ रन जोडे । काठमाण्डूको जितसम्म अविजित रहेका गेर्हार्ड इरास्मस र आदील आलमले क्रमशः एक र आठ रन बनाए । काठमाण्डूले जनकपुरको लक्ष्य पूरा गर्दा १८ ओभरमा पाँच विकेटमात्र गुमाएको थियो ।

बलिङतर्फ पनि जनकपुरको प्रदर्शन फितलो रह्यो । कप्तान अनिल साहसँगै किशोर महतो, ललित राजवंशी, इटोन र कृष्णमुर्थीले समान एक विकेट लिए ।

“हाम्रो लागि यो उत्कृष्ट सुरुआत हो । हाम्रो स्थानीय र विदेशी खेलाडीको टिमवर्कले गर्दा जित सम्भव बन्यो,” जितपछि काठमाण्डूका कप्तान करणले भने । 

हारबाट विचलित छैन साविक विजेता
साविक विजेता जनकपुर पहिलो संस्करणमा लगातार चार खेल जित्दै सानदार सुरुआत गरेको थियो । तर, सोमबार पहिलो खेलमै पराजित हुँदा १६० रनको योगफल बनाउने लक्ष्य रहे पनि त्यहाँसम्म पुग्न नसकेको बताए ।

“हामीले बीचमा साझेदारी बनाउन सकेनौँ । आसिफले गरेको सुरुआतमा साथ दिने अरु भएनन् । हाम्रो लक्ष्य १६० रनसम्म पुग्ने भन्ने थियो । तर, त्यति बनाउन सकेनौँ,” अनिलले भने । 

अनिलको कप्तानीमा मैदान उत्रिएको जनकपुर वेस्ट इन्डिजका चर्चित पूर्वक्रिकेटर शिवनारायण चन्द्रपालको प्रशिक्षणमा छ । पहिलो संस्करणको च्याम्पियनले दोस्रो संस्करणको पहिलो खेलमै हार बेहोर्दा स्वाभावलै प्रश्न उठ्यो, साविक विजेताको ट्याग हुँदा दबाब बढेको हो ?

जवाफमा अनिलले भने, “हामीले पहिलो संस्करण जितिसक्यौँ । दबाब अरु टिमलाई होला, हामीलाई छैन । जनकपुर उपाधि रक्षा गर्न भनेर नै आएको हो ।”