तराईमा खडेरी : मधेस र कोसी प्रदेशमा धान रोपाइँ न्यून

काठमाडौं । तराई क्षेत्रमा पानी नपरेपछि धान रोपाइँमा प्रभाव परेको छ । अन्य प्रदेशमा गत वर्षकै हाराहारी रोपाइँ हुँदा यो वर्ष मधेस र कोसी प्रदेशमा धान रोपाइँ न्यून देखिएको छ । 

साउन ११ गतेसम्म मधेस प्रदेशमा ५१.८२ प्रतिशत र कोसी प्रदेशमा ८०.३९ प्रतिशत धान रोपाइँ भएको छ । गत वर्षको साउन १३ गतेसम्म मधेस प्रदेशमा ९२ प्रतिशत र कोसी प्रदेशमा ९०.७ प्रतिशत धान रोपाइँ भएको थियो । 

कृषि विभागअन्तर्गतको बाली विकास तथा कृषि जैविक विविधता संरक्षण केन्द्रका अनुसार, यो प्रदेशमा तीन लाख ७२ हजार ६४५ हेक्टरमा धान रोपाइँ हुन्छ । तर, साउन ११ गतेसम्म मधेसमा एक लाख ९३ हजार ११६ हेक्टर जमिनमा रोपाइँ भएको छ । 

कोसी प्रदेशमा दुई लाख ७६ हजार ३८६ हेक्टरमा धान रोपाइँ हुन्छ । तर, साउन ११ गतेसम्म दुई लाख २२ हजार १९२ हेक्टरमा धान रोपाइँ भएको छ ।

सबैभन्दा बढी रोपाइँ सुदूरपश्चिम प्रदेशमा ९८.९४ प्रतिशत भएको छ । यो प्रदेशमा गत वर्षको साउन १३ गतेसम्म ९९.६ प्रतिशत रोपाइँ भएको थियो । यो प्रदेशमा एक लाख ७६ हजार १५१ हेक्टरमा धान रोपाइँ हुन्छ । साउन ११ गतेसम्म सुदूरपश्चिम प्रदेशमा एक लाख ७४ हजार २८६ हेक्टरमा धान रोपाइँ सकिएको छ ।

देशभर कुल १३ लाख ७८ हजार ९६६ हेक्टर जमिनमा धान रोपाइँ हुन्छ । साउन ११ गतेसम्म सात वटै प्रदेशमा कुल १० लाख ८७ हजार १४८ हेक्टरमा रोपाइँ भइसकेको केन्द्रले जनाएको छ । 

केन्द्रका अनुसार, कोसी प्रदेशमा ८०.३९ प्रतिशत, वाग्मती प्रदेशमा ८७.१९ प्रतिशत, गण्डकीमा ८४.५३ प्रतिशत, लुम्बिनीमा ९२.०४ प्रतिशत र कर्णाली प्रदेशमा ९१.३८ प्रतिशत धान रोपाइँ सकिएको छ ।  

गत वर्षको साउन १३ गतेसम्म कुल ९२.६ प्रतिशत धान रोपाइँ भएकोमा यो वर्षको साउन ११ गतेसमम ७८.८४ प्रतिशत मात्र भएको छ ।